Venti muyeres que vienen de los más
reconocíos grupos etnográficos asturianos xuntáronse hai diez años
p’amosar y grabar los toques de panderu y pandereta qu’acompañen
al cantar n’Asturies. El proyeutu camudó nun reconocimientu al
papel de la muyer asturiana como depositaria de bona parte de la
tradición musical del país. Cuatro discos nel mercáu (Muyeres I,
Muyeres II, Pasamentu y Onde canta la culiebra); el montaxe de
dellos espectáculos nacionales ya internacionales; collaboraciones
con músicos como Jose Ángel Hevia, Ramón Prada, Chus Pedro, Tina
Gutiérrez; la participación en dellos festivales (Festival Folk
Segobia, Xosé Alfonso Seixal, Lorient, Expo de Lisboa, San Marino,
Sabandeño de La Laguna, Les Anthioises); la obra Kelthiké de Ramón
Prada, basada na voz tradicional asturiana, onde Muyeres ye la
principal protagonista, algamando muncho ésitu de públicu y
crítica … ficieron del grupu una de les referencies d’anguaño de
la nuestra música tradicional d´Asturies.
Inda suenen, con esti nuevu espectáculu Muyeres da un pasu más y
pretende facer un viaxe emocional qu’acerque al púplicu a tol
simbolismu que reflexen les vides silenciaes de tantes muyeres
nuna sociedá nun tan lexana y de la que nun podemos negar que
venimos. Pa facer posible esti viaxe ye perimportante la propuesta
escénica qu’envuelve a la música, los cantares, los bailles…
L’exe central del espectáculu ye la muyer, la muyer como
tresmisora de la tradición oral, la muyer que canta mientres
acuna, mientres llava, mientres siega, mientres danza… Basta con
que la voz d’una muyer vaya ligando cada melodía convertida
n’emoción y cola so rueca poco a poco vaya “filando tola so vida”
mientres les voces de les otres muyeres “inda suenen” incluso al
acabar l’últimu son.
